Daaddihiso: Yaasmiin Maxamed Kaahin
Caweyskani waxa uu ka mid ahaa kuwa ugu waaweyn ee ka dhacay Xarunta Dhaqanka ee Hargeysa intii ka dambeysay Carwada Buugaagta. Dadka ka soo qayb galay oo kor u dhaafay 800 oo qof ayaa diyaar u ahaa in ay dhegaystaan, muuqaalkoodana ka bogtaan afar abwaan oo ah kuwa ay dhallinyartu aad ugu xidhan tahay xilligan. Cabdiraxmaan Abees, Cabdiqaadir Qalinle, Xasan Dhuxul “Laabsaalax” iyo Cabdillaahi Xasan “Ganey” ayaa caweyskan suugaantooda qayb ka mid ah u soo xulay bulshada soo hor fadhiday iyo kuwa sida tooska ah hawada uga la socdayba.
Mawduucyadu waxa ay isugu jireen kuwo wacyi bulsheed ah iyo kuwo madadaalo ah, labadaba. Sidee loo dabar jaraa qabyaaladda iyo faquuqa noocyadiisa kala duwan? Sidee bulshadu ku noqon kartaa mid caafimaad qabta? Sidee se loo sixi karaa khaladaadka jira iyada oo aan la lumen waxa la wada leeyahay? Suugaantu miyay ka saamayn yartay tii qarnigii hore dabayaaqadiisii la tirin jirey? Haddii ay sidaas tahay, waa maxay sababtu? Waa weydiimo lagaga jawaabay tix iyo tiraab labadaba.
